દેશના હીરા વ્યવસાયના હાર્દ સમા ગુજરાતમાં મંદીની અસર દેખાઈ રહી છે.અહીં 19 જાન્યુઆરીએ 31 વર્ષીય હીરા કામદાર વિપુલ જીંજાળાએ આત્મહત્યા કરી લીધી હતી.તેના નાના ભાઈએ જણાવ્યું કે છેલ્લા કેટલાક મહિનાઓથી તેનો ભાઈ આર્થિક સંકટનો સામનો કરી રહ્યો હતો.વધતી જતી મોંઘવારી સાથે પગાર પણ ઘટતો ગયો અને તેના ભાઈ માટે બે ટાઈમનો રોટલો મેળવવો મુશ્કેલ બન્યો.
સાથે જ સુરત ડાયમંડ યુનિયનના પ્રમુખ રમેશ જીલરીયા કહે છે કે વિપુલ એકલો ન હતો. આ સિવાય હજારો કામદારો તેમના પરિવારની જરૂરિયાતો પૂરી કરવા માટે સંઘર્ષ કરી રહ્યા છે.બાળકોની શાળાની ફી અને રોજબરોજના ઘરખર્ચને પહોંચી વળવું મુશ્કેલ બની રહ્યું છે. કર્મચારીઓ EMI ચૂકવવામાં સક્ષમ નથી.
ગુજરાત તેના હીરાના વ્યવસાય માટે જાણીતું છે.ડાયમંડ યુનિયન દ્વારા ધંધામાં સમસ્યાઓ અંગે ભૂતકાળમાં ઘણી વખત અવાજ ઉઠાવવામાં આવ્યો છે. ડાયમંડ યુનિયનના પ્રમુખ રમેશ જીલરીયાએ જણાવ્યું હતું કે હીરાના ઉત્પાદનમાં 21 ટકાનો ઘટાડો થયો છે.લગભગ 10 હજાર કર્મચારીઓએ નોકરી ગુમાવી છે.ઘણા લોકોના પગારમાં કાપ મુકવામાં આવ્યો છે.
દેશના ત્રણ સૌથી મોટા ડાયમંડ પ્લાન્ટ સુરત, મુંબઈ અને કોલકાતામાં છે.કોરોના વાયરસના કારણે અહીં માત્ર 70-80 ટકા કર્મચારીઓ જ કામ કરી રહ્યા છે.ગયા વર્ષે વિશ્વની સૌથી મોટી હીરા કંપની ડી બિયર્સ ખોટમાં હતી.હીરા ઉદ્યોગમાં કોરોના રોગચાળા પછી હજારો લોકોએ તેમની નોકરી ગુમાવી છે.
ઈકોનોમિક ટાઈમ્સના અહેવાલ મુજબ વર્ષ 2016થી જ હીરાના વેપારીઓ માટે મુશ્કેલીઓ ઉભી થવા લાગી હતી.2016માં નોટબંધી, 2017માં GST, 2018માં નીરવ મોદી અને મેહુલ ચોકસીના કૌભાંડોએ સૌથી વધુ નુકસાન કર્યું.આ પછી, મોંઘવારી અને કોરોનાને કારણે, અત્યાર સુધી મંદીનો સમયગાળો ચાલી રહ્યો છે.
